Ningures

NutritionData

Ninguén — Tue, 10 Nov 2009 12:10:20 +0000

NutritionData é un sitio da Internet onde podedes ve-la composición dos alimentos (emprega a base de datos da administración estadounidense), as vosas necesidades diarias, facer un seguimento das vosas dietas, crear e avaliar receitas, etc.

A análise é exhaustiva: tódolos ácidos graxos, minerais, aminoácidos, etc.

Iso si, o sitio está en inglés e cómpre rexistrarse para acceder ó uso persoalizado das análises. Nada que non poidades facer os internautas do século XXI, ou?

Leite Leyma Natura

Ninguén — Tue, 10 Nov 2009 11:16:33 +0000

Hai pouco falei cunha persoa que traballa na Consellaría de Medio Rural. Xurdiu o tema do Leite Feiraco Unicla, e díxome que Leite Río tiña outro semellante: Leyma Natura.

Neste caso trátase dun leite pasteurizado (disque terán tamén unha versión UHT) de vacas mantidas únicamente con pastos. O resultado é un 20% menos de ácidos graxos saturados e o dobre de omega 3 que o leite habitual nas tendas. Haberá que probalo!

Nas fotos publicadas vese tamén Leyma Natura Desnatada! Se o beneficio deste leite está no seu perfil lipídico e lle saca-la graxa, ó final terás… un leite desnatado normal! Agás o feito de que a súa producción foi máis ecolóxica…

Por outra banda, mercando este leite, igual que o que sucede co da cooperativa Feiraco, asegurámonos de que procede de vacas criadas en Galiza.

Leite Feiraco Unicla

Ninguén — Thu, 10 Sep 2009 22:24:01 +0000

Feiraco Unicla évos un leite enteiro (2,9% de graxa). E qué? Pois que ó alimentaren as vacas con herba e semente de liño acadan un 18% menos de graxa saturada e catro veces máis Omega 3, entroutros beneficios. E sen ter que engadir nada alleo ó propio leite!

Probamo-lo leite en Ningures e… sabe igual que o leite enteiro de sempre digamos “normal” (porque rima con “igual”).

Ademáis, a cooperativa galega Feiraco asegura que todo o seu leite se produce en Galiza. Mercar leite Feiraco é porén defende-la nosa economía, o noso xeito de vivirmos espallados en contacto ca natureza e a nosa paisaxe.